Vi trur at samarbeidet klynga har hatt utgjer noko av det sterkaste momentet vi har. Det gir betre konkurransekraft, det gir optimal ressursbruk, og det gir god trivsel på jobb. Å vite at ein er ein del av ein større samanheng er viktig, og vi trur at ein kjem lengre både som enkeltmenneske og bedrift når ein opplever dette.

Den maritime klynga på Sunnmøre har ei sterk historie, er alltid i endring og utvikling, leverer geniale produkt i verdsklasse, og er definitivt ein viktig del av det grøne skiftet. I tillegg er den ofte svaret på festtalar frå politisk hald.

No er tida komen for å vidareutvikle og styrke dette samarbeidet gjennom nye satsingar i nye marknader. Det ligg definitivt nokre spanande og givande år framfor oss.

Hausten 2021 har difor Mafoss, i samarbeid med Sparebanken Møre, gjennomført eit forstudium for å kartlegge status og behov innan sentrale fagområde i den maritime næringa. I tillegg har vi samla kunnskap for å sjå på korleis ein betre kan arbeide med rekruttering og promotering av vår region framover. For å gjennomføre forstudiet har vi tilsett Jannike Tuvik Skarbø som prosjektmedarbeidar i 60 prosents stilling. Jannike arbeider saman med ei styringsgruppe som har ekstra fokus på desse områda.

Styringsgruppa for Kompetanseprosjektet består av desse personane:
Gunvor Ulstein, Ulstein Group.
Hallvard Pettersen, Brunvoll Volda.
Inge-Jonny Hide, Myklebust verft.
Olav Haug Vikebakk, Hareid Group.
Jogeir Romestrand, Evotec/ Entec Group.

Gjennom forstudiet har vi kartlagt framtidig og noverande kompetansebehov i bransjen, og vi har utfordra industrien på metodar for betre formidling av eksisterande kompetanse.

Vegen vidare
Forstudiet er no i ei fase der ein er i ferd med å avslutte analysen av funna. Dei første oversiktene viser at det er betydeleg vilje frå bedriftene til satsing, at behovet for fagfolk er stort, samt at satsing inn mot eit grønt skifte krev nye fagområde og rekruttering til arbeid i regionen må gjerast smartare i framtida. Vi ser at det er behov for å utvikle eit rammeverk og ein systematikk for korleis ein best mogleg kan rigge seg for å hindre tap av, og stagnasjon i, naudsynt kompetanse. Vi jobbar difor med å etablere samarbeid om eit pilotprosjekt med oppstart i januar 2022, for å teste systematikken og konklusjonen frå forstudiet, og for å finne ein berekraftig driftsmodell for det framtidige arbeidet.

Arbeidet rundt dette skjer i tett dialog med både NAV og LO/Fellesforbundet for å sikre transparens og gjensidig nytte og forståing av problemstillingane.

Skaparhuset skal samle verkemiddelapparatet, skule og arbeidsliv til eit kreativt, utfordrande og spanande fellesskap. Skaparhuset held til i sentrum av Ulsteinvik og er ein arena for innovasjonsarbeid, undervisning, prosessarbeid, seminar, gründerverksemd og, kanskje viktigast, kopling mellom desse aktivitetane.

Andre partnarar er ÅKP, Høgskulen i Volda, Ulstein kommune, Ulstein Næringsforum, NCE iKuben, Ulstein Vidaregåande skule, ProtoMore og Sparebanken Møre.

Utfordringane med koronastengt samfunn har vore utfordrande også for Skaparhuset, men vi ser no at engasjement og bruk aukar for kvar månad når bedrifter og andre legg fleire fysiske møter og workshops ut av eige hus. Vi vonar at dette vil ta seg opp att så snart samfunnet blir normalisert etter pandemien.

Les meir og kontakt gjerne dagleg leiar Kjersti Kleven eller Skaparguide Tobias Hatløy via www.skaparhuset.no.

«MAFOSS skal vere ein uavhengig regional tilretteleggar som skal samle,
forsterke, synleggjere og utfordre den verdsleiande maritime og marine klynga som medlemsbedriftene på Søre Sunnmøre er ein del av.»

Behova i marknaden og måla til våre medlemsbedrifter er vår fremste drivar, og MAFOSS jobbar aktivt for saker som er forankra i strategiane til våre medlemmer.

Dette inneber arbeid for sikring av kompetanse i vid forstand, for betring av samferdselstilbod via veg, luft og sjø, samt for å sikre gode vilkår og rammevilkåra for ei næring som er svært viktig for regionen og Norge som nasjon.
Ein har særleg fokus på kontakt med politiske nivå frå regionalt til sentralt for å få forståing og handling i samband med utfordringane i industrien vi representerer.

MAFOSS jobbar godt saman med Norsk Industri og SEA Europe, samt andre aktørar for å løfte enkelte bransjesaker inn til sentrale forum i tillegg til enkeltsamarbeid med andre interesseorganisasjonar frå sak til sak.

Klyngeetablering og tydeleg posisjonering på 60-talet, der altså. For medlemene var det særs viktig å sikre godt samarbeid mellom bedriftene og minst like viktig å sikre utdanningstilbod for fagfolk slik at ein kunne levere stadig meir komplekse skip.

Stiftarane av Foreininga i 1969 var
Hjørungavåg Verksted AS,
Hasund Mek. Verksted AS,
Hatlø Verksted AS,
Kleven Mek. Verksted AS,
Smedvik Mek. Verksted AS,
Ulstein Mek. Verksted AS og
Gerh. Voldnes AS.

I dag er nokre av desse borte, medan andre er blitt slått saman med større verksemder. Det er fire verft på Søre Sunnmøre per i dag, og alle er medlemmer i MAFOSS: Ulstein Group AS, Green Yard Kleven AS, Larsnes Mek. Verksted AS og Myklebust Verft AS.

I tillegg til verfta representerer MAFOSS dei fleste av verksemdene innan den maritime og marine leverandørindustrien på Søre Sunnmøre. Medlemsbedriftene utgjer soleis ei komplett verdikjede, frå idé og design, via utstyr og system, til bygging, samanstilling, testing og ferdigstilling.

MAFOSS og kommunane
MAFOSS sitt nedslagsfelt er bedrifter som jobbar inn mot maritim og marin verksemd i kommunane Volda, Ørsta, Vanylven, Sande, Herøy, Ulstein og Hareid – også kalla «sjustjerna» i kommunale samanhengar. MAFOSS har i dag medlemmer frå alle desse kommunane.

MAFOSS og ÅKP
MAFOSS vart i 2020 formelt etablert som eit prosjekt i ÅKP, men har framleis eit eige styre og kontroll på eigen økonomi. Saman med ÅKP skal MAFOSS arbeide for å løyse felles medlemsutfordringar og for å finne synergiar i felles målsettingar.
MAFOSS og utvala

MAFOSS er i dag organisert med fleire utval og arbeidsgrupper, der medlemsbedriftene sender sine fagfolk. Utvala femner desse fagområda: Kompetanse, HR og personell, Logistikk og produksjon, Helse miljø og sikkerheit (HMS) og Forsking og utvikling (FoU). Utvala har fokus på fagområde dei jobbar med til dagleg i sine respektive bedrifter, og representantane deler informasjon og erfaringar frå arbeidet med utvalet dei er med i. Slik utviklar vi oss i lag som bransje på fleire felt.

Styret for MAFOSS er i dag
Hallvard Pettersen, Brunvoll Volda, styreleiar
Margrete Heltne Hovde, TUSSA 24/ WATTN, nestleiar
Jarle Gunnarstein, Larsnes Mek. Verkstad AS, styremedlem
Jogeir Romestrand, Entec Group, styremedlem
Per Erik Dalen, ÅKP, styremedlem

MAFOSS’ administrasjon
I dag består administrasjonen av dagleg leiar Jan Thormodsæter (DL), prosjektleiar Ann Cesilie Skundberg og prosjektmedarbeidar Jannike Tuvik Skarbø.

Ann Cesilie er ansvarleg for pilotprosjektet for integrering og kompetanseheving av integrerte flyktningar, eit prosjekt som har fått nasjonal merksemd og god respons.

Arbeidet er eit samarbeid mellom MAFOSS, NAV, Ulstein, Volda og Herøy kommunar, IMDI (Integrerings- og mangfaldsdirektoratet), Møre og Romsdal Fylkeskommune og Herøy Vidaregåande. Gjennom teori og maskinlæring i skulen og praksis i fleire av våre medlemsbedrifter har rundt femten elevar fått erfaring som etter læretid i bedrift og skule skal ta dei til fagbrev. Det er gjort svært nyttige erfaringar frå prosjektet, og vi ser at ein no vil teste ut dette innan fleire fagbrevløp fleire stader i landet.

Jannike er prosjektmedarbeidar på prosjektet «Kompetanseutvikling Sunnmøre».

Les meir i denne artikkelen.